Indietro

Homepage

- La guerra -

Chiarini Muzio

 

La  dichiarazzion ad guèra

 

 

Spess am capita d'arcurdàr cal dì

e védram, a vint'ann, un diés ad zugn,

int 'n' 'adunata' in piazza, e da la radio

sentir 'na vós padróna, avézza ai cmand,

sicura ad glié, senzza nissùn mez tèrmin,

ampliada in più da du altoparlànt,

dir, con paròl precisi, ciari, tondi:

"Un'ora segnata dal destino

batte nel deh della nostra Patria... '

A la fin, tra gran batùd ad man,

int un frenetich scandir ad "Duce, Duce "
am ciapa un brivid ch’l’am fa sbalzzàr al cuór.
Senzza dir gnent a corr, a corr a cà
e in tal curtìl a tróv tuti dò il mie dòn
quasi il m'asptéss, impaurìdi

dla vós che a ss'iéra bela sparguià.

Mie nòna, piculina, tuta ardùta,

con un ciùff bianch che al sguàita

da sóta al fazzulét d'in co gris scur

comè la so stanèla ach toca in tèra,

col man zunti , alzzadi verss al zziél,

la bada a dir: "Madòna banadéta".

Col brazza agh casca zo a pingulùn,

magra anch'a glié e vastìda anch'a gliè ad scur,

mie mama, con la fazza ch'la tradìss

il fadìgh e i patimént d'na vita dura,

l'am guarda con i occ ùmad che i scór,

che i dis: "Un'altra guèra... Dio miè Sgnór".

Cl'altra, 'dal quingg al zdòt', l'aveva tolt

a glié, al mari, dop póch che i ss'iéra spusà,

e, aveva sòl diés dì, a mi, al papà.

La s'avsìna e l’am brazza e in cal mumént a sent

tutt al turmént d'un'anma marturiàda

d'na zzicatrìzz avèrta, mai saràda.